မင်းဘူးမှာ စစ်တပ်စစ်ကြောင်းထိုးစီးနင်းမှုကြောင့် ကလေးနဲ့ မသန်စွမ်းအမျိုးသမီး သေဆုံး
မကွေးတိုင်း၊ မင်းဘူးမြို့နယ် မုတ္တောကြီးကျေးရွာကို စက်တင်ဘာလ ၅ ရက်နေ့မနက်ပိုင်းမှာ စစ်တပ်စစ်ကြောင်းစီးနင်းဝင်ရောက်ပြီးနောက် အသက်မပြည့်သေးတဲ့ ကလေးတစ်ဦးနဲ့ မသန်စွမ်းအမျိုးသမီးတစ်ဦးကို သတ်ဖြတ်ကာ နောက်ထပ် ဒေသခံနှစ်ဦးကို ဖမ်းဆီးခေါ်ဆောင်သွားတယ်လို့ ဒေသခံတွေက RFAကို ပြောပါတယ်။ သေဆုံးသွားသူတွေဟာ အသက် ၂၀အရွယ် ဆွံ့ အ နားမကြားသူ မဝေဝေဌေးနဲ့ အသက် ၁၃ နှစ်အရွယ် မောင်ဝိုင်းလမင်းအောင်တို့ ဖြစ်ပြီး ဝမ်းဗိုက်၊ လည်ပင်းနဲ့ ရင်ဘတ်တို့မှာ သေနတ် ဒဏ်ရာနှစ်ချက်စီ ဖောက်ဝင်ကာ နေရာမှာတင် သေဆုံးသွားပြီး နောက်ထပ် ဒဏ်ရာရထားတဲ့ အသက် ၆ နှစ်အရွယ် ကလေးငယ်ကိုတော့ ဆေးကုသပေးထားတယ်လို့ ဆိုပါတယ်။ ဖမ်းဆီးခံရတဲ့ ဒေသခံ နှစ်ဦးထဲမှာ အသက်မပြည့်သေးသူ တစ်ဦးပါသွားပြီး ပြန်မလွတ်လာကြသေးဘူးလို့ အမည်မဖော်လိုတဲ့ ဒေသခံတစ်ဦးက ပြောပါတယ်။ “အသက် ၂၀ အရွယ် နဲ့ အသက် ၁၄ နှစ်အရွယ်တစ်ယောက်ပါ။ သူတို့ကို အခုထိစစ်ကြောင်းက ပြန်မလွှတ်ပေးသေးဘူး။ လူသားဒိုင်းအနေနဲ့ ဖမ်းခေါ်သွားတာဗျ။ စစ်တပ်စစ်ကြောင်းက မနက် ၅ နာရီကျော်ကြီး ဝင်လာတော့ ဒေသခံတွေက ရှောင်ချိန်မရတော့ဘဲ ဖမ်းဆီးခံလိုက်ကြရတာ။ ဝရုန်းသုန်းကားပြေးကြရင်း စစ်ကြောင်းနဲ့တိုးပြီး ဖမ်းခံလိုက်ရတာဗျ၊ သတ်ဖြတ်ခံရသူတွေကိုတော့ မနေ့(စက်တင်ဘာ ၅ရက်)ကပဲ သင်္ဂြိုလ်လိုက်ပြီ” အဲဒီစစ်ကြောင်းမှာ စစ်တပ်နဲ့ ပြည်သူ့စစ်ပူးပေါင်း အင်အား တစ်ရာနီးပါးပါလာပြီး ခြေလျင်တပ်ရင်း ခလရ -၈၈ က ပုသိမ်-မုံရွာလမ်းမပေါ်က ပေါင်းရွာလမ်းဆုံမှာ အထိုင်ချထားတဲ့စစ်ကြောင်းတွေနဲ့ ပေါင်းဆုံကာ ရွာတွေကို စစ်ကြောင်းထိုးနေတာလို့ ဆိုပါတယ်။ စစ်တပ်စစ်ကြောင်း ဝင်ရောက်စီးနင်းခဲ့တဲ့ မုတ္တောကြီးရွာမှာ ပြည်သူ့ကာကွယ်ရေးတပ်ဖွဲ့တွေ အထိုင်ချနေထိုင်နေတာ မရှိသလို တိုက်ပွဲလည်း မရှိဘူးလို့ ဒေသခံတွေက ပြောပါတယ်။ မုတ္တောကြီးကျေးရွာနဲ့ ပေကုန်းကျေးရွာ အပါအဝင် ရွာပေါင်း လေးရွာထက်မနည်းက ဒေသခံတစ်ထောင်ခန့်ဟာ စစ်တပ်စစ်ကြောင်းနဲ့ လွတ်ကင်းရာနေရာတွေ၊ လက်နက်ကြီး မကျရောက်နိုင်တဲ့ တောတောင်တွေထဲမှာ ယာယီရှောင်ပုန်းနေကြတယ်လို့ ဆိုပါတယ်။ ဒီအခြေအနေတွေနဲ့ပတ်သက်ပြီး စစ်တပ်ခန့်အစိုးရဘက်က သတင်းထုတ်ပြန်ထားတာ မရှိသေးပါဘူး။ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ရဲ့ ၂၀၂၆ စက်တင်ဘာလ ၄ ရက်နေ့ ထုတ်ပြန်ချက်အရ အာဏာသိမ်းထားတဲ့ ငါးနှစ်ကျော်ကာလအတွင်း စစ်တပ်လက်ချက်နဲ့ အရပ်သား ပြည်သူစုစုပေါင်း ၈,၃၃၄ ဦး သေဆုံးခဲ့ရတယ်လို့ ဖော်ပြထားပါတယ်။