ရေဦးမှာ လေကြောင်းတိုက်ခိုက်မှုကြောင့် အရပ်သား ခုနစ်ဦး သေဆုံး

စစ်ကိုင်းတိုင်း ရေဦးမြို့နယ်၊ တင်းတိမ်ရံရွာမှာ စက်တင်ဘာလ ၇ ရက်နေ့ ညနေပိုင်းက စစ်တပ်ရဲ့ လေကြောင်းတိုက်ခိုက်မှုကြောင့် အရပ်သား ၇ ဦးသေဆုံးပြီး ၃ ဦးထက်မနည်း ဒဏ်ရာရထားတယ်လို့ ဒေသခံတွေက ပြောပါတယ်။ ရေဦးမြို့ရဲ့ အနောက်ဘက် ၁၅ မိုင်ခန့်အကွာမှာရှိတဲ့ တင်းတိမ်ရံရွာဈေးနဲ့ ဘူတာအနီးတစ်ဝိုက်ကို ညနေ ၅ နာရီခန့်မှာ မုံရွာမြို့အခြေစိုက် အနောက်မြောက်တိုင်းစစ်ဌာနချုပ် (နမခ) က တက်လာတဲ့ ဂျိုင်ရိုကော်ပတာ ၃ စီးနဲ့ Mi-35 တိုက်ခိုက်ရေး ရဟတ်ယာဉ် ၁ စီးတို့က လေကြောင်းကနေ ၁၁ ကြိမ် တိုက်ခိုက်ခဲ့တာလို့ ဆိုပါတယ်။ အဲဒီတိုက်ခိုက်မှုကြောင့် တင်းတိမ်ရံရွာ ကားဝပ်ရှော့ကို ဗုံးသီးတွေ ကျရောက်ပေါက်ကွဲပြီး အမျိုးသား ၆ ဦးနဲ့ အမျိုးသမီး ၁ ဦး သေဆုံးခဲ့တာလို့ ဒေသခံတစ်ဦးက RFA ကို ပြောပါတယ်။ “တိုက်ပွဲလည်း မဖြစ်ဘူး၊ ဘာမှလည်း မရှိဘူး။ ဒါကို လေကြောင်းကနေ လာကြဲသွားတာ။ သေဆုံးတဲ့သူတွေထဲမှာ ကားလာပြင်တဲ့ ပန်းကုန်းရွာက တစ်ယောက်နဲ့ ဇီးကုံးရွာက တစ်ယောက် ပါတယ်။ ကျန်တဲ့ ငါးယောက်က ကားဝပ်ရှော့ထဲက” သေဆုံး၊ ဒဏ်ရာရသူတွေရဲ့ အမည်၊ အသက်အရွယ် စတဲ့ အသေးစိတ်အချက်အလက်တွေကိုတော့ မသိရသေးဘူးလို့ သူက ဆိုပါတယ်။ ကားဝပ်ရှော့နေရာ ဗုံးကြဲခံရတာကြောင့် နေအိမ်အဆောက်အအုံတွေနဲ့ ကားတချို့လည်း ပျက်စီးဆုံးရှုံးခဲ့တယ်လို့ ဒေသခံတွေက ပြောပါတယ်။ ဒီလေကြောင်းတိုက်ခိုက်မှုနဲ့ ပတ်သက်လို့ စစ်တပ်ဘက်က တစ်စုံတစ်ရာ ထုတ်ပြန်ထားတာ မရှိသေးပါဘူး။ ၂၀၂၄ ခုနှစ် အောက်တိုဘာလအတွင်းမှာလည်း တင်းတိမ်ရံရွာကို စစ်တပ်က လေကြောင်းကနေ ဗုံးကြဲတိုက်ခိုက်တာကြောင့် ၆ လသားအရွယ် ကလေးငယ်အပါအဝင် အရပ်သား ၄ ဦး သေဆုံးခဲ့တယ်လို့ ဒေသခံတွေက ပြောပါတယ်။ ၂၀၂၂ ခုနှစ်ကလည်း တင်းတိမ်ရံရွာကို စစ်ကောင်စီတပ်တွေ စစ်ကြောင်းထိုးဝင်ရောက်ပြီး မီးရှို့တာကြောင့် ဈေးအပါအဝင် နေအိမ် ၄၀၀ နီးပါး ပျက်စီးခဲ့တယ်လို့လည်း ဆိုပါတယ်။ တင်းတိမ်ရံရွာဟာ အိမ်ခြေ ၇၀၀ ခန့်ရှိတဲ့ စံပြရွာတစ်ရွာဖြစ်သလို ဈေး၊ အထက်တန်းကျောင်း၊ တိုက်နယ်ဆေးခန်း၊ မီးရထားဘူတာတွေပါရှိပြီး ရေဦး-ဘုတလင်-မုံရွာသွား မီးရထားလမ်းပေါ်က အချက်အချာကျတဲ့ ရွာကြီးတစ်ရွာဖြစ်တယ်လို့ ဒေသခံတွေက ပြောပါတယ်။ အမျိုးသားညီညွတ်ရေးအစိုးရ (NUG) ရဲ့ ဩဂုတ်လ ၃၁ ရက်အထိ စာရင်းတွေအရ အာဏာသိမ်းကာလအတွင်း နိုင်ငံတစ်ဝန်း စစ်တပ်ရဲ့ လေကြောင်းတိုက်ခိုက်မှုကြောင့် သေဆုံးသူ ၆,၀၆၂ ဦးအထိ ရှိခဲ့ပါတယ်။